ساعتها واحد قاللى انه بيخاف يشتغل معاها ,, لأنها صعبة جدااا ,, بتزعق فى أحد بيلعب فى الحملة ..!!
مكنتش أعرفها بس كنت هموت وأشتغل معاها لأن الناس اللى زى كده قليلين ..
عارف لما تحس ان ليك اخت بمعنى الكلمة بس مش من والديك .. أول مرة أعرف ان كلمة أخت فى الاسلام الناس مش بتاخدها طريق عشان تتعامل فيه مع البنات ,, عارف لما تلاقى حد كده عبارة عن الصح بيمشى ويشتغل معانا .. حد بيكره الغلط وسمه وناره التقصير فى الشغل !
أخدِت فى مرة تدريب معين فى القاهرة ,, رجعت واعتبرت نفسها مسئولة عن كل متطوع فى العلم قوة انها تديله التدريب ,, ده كمان من يوم ما اشتغلت فى العلم قوة اعتبرت نفسها مسئولة عن كل أمى فى بلدها انها توصله و تعلمه ..
عارف ان فيه ناس بتستهزأ بالكلام ده ,, وتقول انتوا مزودنها فى التعامل أصلا ,, بس لو كنت اشتغلت معاها كنت اتريقت على نفسك أصلا !
عارف معنى ازاى البنت تبقى ملتزمة ومحتشمة وفى نفس الوقت بتعامل كل الناس ,, لأنها بتتعامل بكل أدب واحترام .. عارف لما تلاقى حد بيعلمك بالشغل مش بالكلام ,, بتتعلم منه الاخلاص الحقيقى لله ,, وتجديد النيه فى كل حاجة ,, علمتنا كتير !!
عارف انها كانت بتعزنى جدا فى الشغل ,, بس مع الأسف فى أخر أيام شغل ليها زعلت منى عشان افتكرت انى كنت مخبى عنهم حاجات متعلقة بالشغل ,, بس والله ما كان فى نيتى حاجة ,, ده كان اجتماع عادى وأنا نسيت أقول ,, عادى والله !!
كل ده مش موجود دلوقتى ,, عشان هيا دلوقتى عند ربنا ,, دلوقتى بقى هيا بتسأل ,, بس بقى أكيد مش هتقف فى أى سؤال ,, أكيد الاجابات بتاعتها هتبقى أسرع من الصاروخ ,, أكيد بقى ان شااااء الله :)
كلمة بس لأى شخص تعامل معاها .. أوعى تزعل عليها ,, بالعكس انت المفروض تموت من الفرحة ,, دى توفت فى ليلة من الليالى العشر من شهر رمضان ,, وكمان فى وقت الفجر ,, تقريبا مفيش أحلى من كده ,, أدعولها بس !
اللهم ارحمها وارحم موتى المسلمين ..
اللهم أسكنها فسيح جناتك ..
يارب متكونش لسة زعلانة منى ..
أ/ مروة بدر
